ದೇವನೊಬ್ಬನೇ ನಾಮ ಹಲವು

 ದೇವನೊಬ್ಬನೇ ನಾಮ ಹಲವು

ಅವನ ನಾಮವೇ ನಮ್ಮ ಬಲವು

ಅವನು ಒಲಿದರೆ ಎಲ್ಲ ಚಲುವು

ಸೋಲಿನಲ್ಲೂ ಇಹುದು ಗೆಲುವು

ಎಲ್ಲಿ ನೋಡಿದರಲ್ಲಿ ಅವನೇ

ಎಂದು ಹೇಳುವರೆಲ್ಲ, ಶಿವನೇ!

ನಿನ್ನ ದರುಶನ ತೋರು ಹರನೇ, 

ಬಾರೋ ತಂದೆ ಬಿರನೆ ಬಿರನೆ! 

ಕಾಣದಾಗಿಹನವನು ಏಕೆ?

ಅವನ ಕಾಣಲು ಭಕುತಿ ಸಾಕೆ? 

ಮನವ ತುಂಬಿದೆ ಒಂದು ಬಯಕೆ,

ಕಾಣಲವನನು ಪುಣ್ಯ ಬೇಕೆ? 

ನೂರು ಜನುಮವ ತಾಳಿ ಬರುವೆ, 

ಎಲ್ಲು ಅಲುಗದೆ ಇಲ್ಲೆ ಇರುವೆ,

ತೋರು ನಿನ್ನನು ಜಗದ ಗುರುವೆ, 

ನಮ್ಮ ಕಾಯುವ ಆದಿ ಮರವೆ!