ತಂದೆ ಶ್ರೀ ಕೃಷ್ಣನಾ ಹೃದಯದಲಿ ನಾನು,
ನನ್ನ ಈ ಹೃದಯದಲಿ ಶ್ರೀ ಕೃಷ್ಣ ಭಾನು!
ಬೆಳಕನ್ನು ನೀಡುವನು, ಕಷ್ಟಗಳ ನೀಗುವನು,
ತಂದೆ ನೀನೆಂದೊಡೆ, ಕರುಣೆಯಲಿ ಕರಗುವನು!
ಕಾರಣಕೆ ಕಾರಣನು ಲೋಕಕೇ ರಕ್ಷಕನು,
ರುಕ್ಮಿಣೀ ವಲ್ಲಭನು, ಕಾಲದಾ ಭಕ್ಷಕನು!
ಭಾಸ್ಕರನು, ಅರ್ಯಮನು, ದಿವಕರನು ಶಿವನು,
ಸ್ಥಿತಿ-ಸೃಷ್ಟಿ-ಲಯ ಕರ್ತ ಎಲ್ಲವೂ ಇವನು!
ಇವ ಮಿತ್ರ, ಇವ ಸತ್ರ, ಸರ್ವತ್ರನಿವನು,
ಇವ ಅಸ್ತ್ರ, ಇವ ಶಸ್ತ್ರ, ಇಡಿ ಶಾಸ್ತ್ರನಿವನು!
ಇವ ಒಂದೆ, ಇವ ತಂದೆ, ಲೋಕಕೇ ಹಿತನು,
ಇವ ಬಿಂದು, ಇವ ಬಂಧು, ಮತನೂ ಇವ ಅಮಿತನು!
ಪಾಂಡವರ ದ್ರೌಪದಿಯ ಕಷ್ಟದಲಿ ಕಾದವನು
ಕುಂತಿಗೆ ಒಲಿದವನು, ಶ್ರೀಧರನು ಮಾಧವನು!
ಕೆಡುಕರಿಗೆ ಕೆಟ್ಟವನು, ಗೀತೆಯನು ಕೋಟ್ಟವನು,
ಬ್ರಹ್ಮಾದಿತಿ ಸುತರ ದರ್ಪವನು ಸುಟ್ಟವನು!
ಸಾಕ್ಷಿಯಾ ರೂಪದಲಿ ಎಲ್ಲವನು ಬಲ್ಲವನು,
ನಡೆದವಗೆ ನಡೆಯುವನು, ನಿಂತವಗೆ ನಿಲ್ಲುವನು!
ಬಿಲ್ಲನೂ ಹಿಡಿಯುವನು, ರಾಕ್ಷಸರ ಕೊಲ್ಲುವನು,
ಎಲ್ಲವನು ಸೆಳೆಯುವನು, ಬೆಳಕಲ್ಲೂ ಹೊಳೆಯುವನು!
ಶ್ರೀ ಕೃಷ್ಣನಿವನು ಶ್ರೀ ಕೃಷ್ಣನಿವನು
ಶ್ರೀ ಕೃಷ್ಣನಿವನು ಶ್ರೀ ಕೃಷ್ಣನಿವನು!
No comments:
Post a Comment